ઈઝરાયલને ઝટકો, યુરોપના દેશોનો મોટો નિર્ણય: આયરલેન્ડ, નોર્વે અને સ્પેને પેલેસ્ટાઈનને એક રાષ્ટ્ર તરીકેની સત્તાવાર માન્યતા આપવાની જાહેરાત કરી
![top-news](https://gujaratvandan.com/public/uploads/images/newsimages/GujaratVandan22052024_114002_palestine 22.webp)
- 22 May, 2024
આયરલેન્ડ, નોર્વે અને સ્પેને પેલેસ્ટાઈનને એક રાષ્ટ્ર તરીકેની સત્તાવાર માન્યતા આપવાની જાહેરાત કરી છે. જાહેરાતથી ગુસ્સે ભરાયેલા ઈઝરાયલે તાત્કાલિક ધોરણે આ ત્રણેય દેશોમાં રહેલા પોતાના રાજદ્વારીઓને પાછા બોલાવી લીધા છે. આયરલેન્ડના વડાપ્રધાન સાઈમન હેરિસે બુધવારે જણાવ્યું હતું કે આ આયરલેન્ડ, સ્પેન અને નોર્વેએ સાથે લીધેલું પગલું છે. તેનો હેતું ટુ-સ્ટેટ સોલ્યુશનના માધ્યમથી ઈઝરાયલ અને પેલેસ્ટાઈન વચ્ચેના કાયમી સંઘર્ષનું સમાધાન લાવવાનો છે.
ત્રણેય દેશોના નિર્ણયથી ઈઝરાયલ ભડક્યું હતું. તેના વિદેશમંત્રી કાટ્ઝેએ આયરલેન્ડ અને નોર્વેથી ઈઝરાયલના રાજદૂતને તાત્કાલિક ધોરણે દેશ પરત ફરવા આદેશ કરી દીધો છે. સ્પેનના વડાપ્રધાન પેડ્રો સાંચેજે કહ્યું કે તેમનો દેશ 28 મેના રોજ પેલેસ્ટાઈનને એક સ્ટેટ તરીકે માન્યતા આપશે. કાટ્ઝેએ કહ્યું કે નોર્વે અને આયરલેન્ડ સાંભળી લે કે અમે આ મામલે ચુપ નથી બેસવાના.
ચાલુ મહિનાની શરૂઆતમાં સ્પેનના વિદેશમંત્રી જોસ અલ્બેરેસે કહ્યું હતું કે તેમણે અમેરિકાના વિદેશમંત્રી એન્ટની બ્લિંકનને પેલેસ્ટાઈનને માન્યતા આપવાની તેમની સરકારની મંશા વિશે અગાઉથી જાણ કરી દીધી હતી. જોકે સ્પેનને પણ ઈઝરાયલે ચેતવણી આપતાં કહ્યું હતું કે તેની સામે પણ અમે નોર્વે અને આયરલેન્ડ જેવા જ પગલાં ભરીશું.